في البداية الطفل ذاكرته بتكون قصيرة المدي بمعني إنه بينسى بسرعه جدا ، لكن العقاب سواء بالضرب أو بالتوبيخ للاسف مش بينساه ، يعني الطفل بينسى هو ليه اتعاقب بس مبينساش العقاب.

فلازم ناخد بالنا كويس من النقط دي:

أولا : مينفعش نعاقب أطفالنا علي حاجه احنا اصلا بنعملها قدامهم على طول لانه مهما عاقبته عليها عمره ما هينساها، و هيفضل يقلدك فيها ، يعني مثلا الاب أو الأم حد فيهم كذب كذبة الطفل بيكون مركز وقتها وبيفهم ده فا بالتالي بيقلد أبائه ، فا نخلي بالنا جدا من تصرفاتنا قدامهم.

ثانياً : مينفعش نعاقب الطفل علي كل تصرفاته سواء كانت كبيرة أو صغيرة ، حاول تراقب طفلك عن بعد وشوف تحركاته وواجهه بعديها بالصح من غير ضرب أو إهانة.

ثالثا: وقت ما تعاقب الطفل لازم العقاب يكون في وقت حدوث الخطأ عشان الطفل يدرك ان اللي عمله ده غير صحيح و ميعملوش تاني ، مفيش حاجه اسمها انا هعاقبه على كل تصرفاته مره واحده وتنفجري فيه بطريقة شديدة ، بالعكس ده غلط جدا والطفل مش هيفهم ده.

رابعاً : الحاجة اللي اتقال عليها غلط تبقي غلط دايما ، يعني مينفعش بعد ما اقول غلط اروح بعد فترة اعملها قدامه أو اسيبه يقررها.

خامساً : دايما العقاب مرتبط بالخطأ ، يعني لو الطفل عمل شقاوة بيكون عقابه حرمانه من الشئ اللي بيحبه بس ميكونش العقاب لمدة طويلة لازم يبقي وقت محدد ، مثلا الطفل كسر لعبته عقابه أن مفيش لعب تاني عشان يحافظ عليهم ، وبرضه مش فترة طويلة ، لكن مينفعش يكسر لعبته نروح نعاقبه بإنه محروم من التليفزيون ، ده ملوش علاقه بده ، لازم العقاب يكون مرتبط بالخطأ.

سادساً : منهددش الطفل بعقاب واحنا مش بنفذه ، التهديدات الهوائية بتخلي الطفل يستخف بكلام أبائه.

سابعاً : ممنوع منعاً باتاً إننا نهدد الطفل بالقتل أو الموت ، احنا بنربيهم مش بنرعبهم.

ثامناً : التحذير من العقاب يكون واضح يعني مفيش حاجه اسمها اياك تعمل كدا لحسن اوريك.. خلينا نقول لو منظمتش غرفتك من اللعب يبقي مش هتلعب بيهم لمدة أسبوع مثلا.

تاسعا : مينفعش نعاقب أطفالنا قدام حد سواء كان قريب أو صديق ، علاقتك بإبنك او بنتك لازم تفضل بينكم وبين بعض.

عاشرا : الغرض من العقاب هو التربية والتقويم ، مش الإهانة والضرب ، لازم نوجه أطفالنا للصح ، اقعدوا مع أولادكم والعبوا معاهم . قربوا منهم . امدحوهم كتير وكافؤوهم على كل حاجه حلوة بيعملوها ده بيجيب نتيجة أفضل.