القلب يغوى الحنية،

حتى في لغة القلوب، الشوق اسمه الحنين.

و العقل يغوى الفهم،

و يفضل يحل المشكلة، سنين وراها سنين.

ليه القسوة بقت غية،

و ما بقاش زى زمان، البشر بيهزهم الأنين.

….

فين المشكلة ؛ في البشر، في المفاهيم ، و لا في الحياة

….

البشر هما البشر ما تغيروش،

فيهم الطيب و الخبيث ، الخير و الشرير،

و الطماع الاستغلالي،

و اللي بيعطي الغير من قوته الضروري.

و المفاهيم هيا المفاهيم من ايام قابيل و هابيل،

كل واحد عاوز يكوش على رزق الغير .

و كل واحد عاوز يكون السيد الوحيد.

و يقول لك ببجاحة سافرة ،

ربنا خلق الباقيين عشان يكونوا سبب لسروري.

و الحياة هيا الحياة من يوم ما ربنا ابدع الحياة،

شتا بعده ربيع ، و حر بعده برد ،

و ليل بعده نهار و نور بعده ضلمة

و الأرض بتدور و احنا بندور معاها ،

و بنقولها دايما دوري ..دوري كمان دوري

….

فين المشكلة. .مش عارف ..

ما أنا لو عارف ماكنتش سألت

جايز ..اكون انا اللي اتغيرت ..

انا باقول ..جايز ..جايز……